一顆香港小種子
--
花博一日遊後感~*(純綷分享冇相^^")

[隱藏]

啱啱去完台灣返黎，當中都有預一日時間去行花博。

感覺花博所有設施都好完善，每個區有儲物櫃，免費接駁車既位置又指示情晰，上車後司機又會講每個站有d咩館唔驚落錯車，甚至車上都wifi可以提你幾時落車(大鄉里既我真係覺得好貼心 )；
場館排隊入場時秩序良好，即使好長龍但都發覺條隊係keep walking，實際排隊時間遠比指示牌所寫既短。等入場時又有職員講解場館設計等，重點係個個都好好笑容，令人排得好舒服。

不過花博真係好大，如果有意行完所有場館既朋友真係起碼預2-3日，因為當中d場館都要排隊，人多起上起排一個鐘已經算少。我去一日只係來得及揀其中一個區做主要，一個區做次要咁遊覽。
而且5點幾就會天黑，當然天黑都有天黑既野睇，不過戶外既花海就點都係有太陽時睇比較好吧

我去左既館唔係好多，不過其實除左要預約券既要早d去拎預約券外，其他既場館真係唔急住要第一時間入去，因為個館唔會走左去，而且入黑時去睇都冇問題。
如果你下午先入場既話，不妨先行左戶外再去排隊入館參觀(不過我唔確定d場館會唔會早d閂門...因為我行到八點幾就走左，如有誤還請各位大大糾正)。

睇到呢到，如果你期待既係花既分享就唔好意思了，因為論心態，我係以參與一個盛事既心態去遊覽；
論愛花，作為一個女仔我都好鍾意花，不過真係純欣賞但唔識觀賞；
論攝影，一向隨心想影乜就影乜，角度或者會間中留意下，但效果真係見仁見智，有云"獻醜不如藏拙"，相就唔post lu~
所以抱歉，我只能講句：裡面有好多花好靚，平時好難得可以見到一片色彩斑斕既花海，而且既然咁啱遇到有呢d唔係年年有既博覽會，但去無妨

順帶一提，我張一日門票係係酒度(新驛)買，只需nt$180，應該係團體訂購價黎，不過佢冇刻意sell，只係寫左係門口出面塊黑板既當中一句，如果唔係我八卦去睇都未必留意到 ...
住新驛而又打算去既朋友可以去櫃台問下仲有冇(據佢講賣晒就冇)，其他既大家不妨留意下你地住既酒店有冇得買。(或者呢個先係重點? )

純綷分享，希望大家唔會嫌我多字得黎又幫助唔大